طريقه عمل الرز بلبن بالكريمه والمكسرات
●《طريقه عمل الرز بلبن بالكريمه والمكسرات 》
الرز بلبن من الحلويات البسيطه والجميله اللى ديما بتفكرنا بالبيت ولمه العيله، وكمان مش محتاجه مكونات كتيره ولا خطواط صعبه. الأجمل انك تقدري تعمليه في البيت بطعم كريمي ولذيذ جدا، وتقدميه ساده او تزينيه بالمكسرات والزبيب وجوز الهند حسب زوقك.
●《المكونات》
(1)- 1 كوب أرز مصري.
(2)- 4 اكواب لبن كامل الدسم
(3)- نصف كوب سكر، او ممكن تزودي او تقللي على حسب ما انتي عايزه
(4)- كوب ونص مياه تقريبا لسلق الرز
(5)- معلقه كبيره نشأ
(6)- كيس فانيليا
(7)- معلقه كبيره قشطه او كريم شانتيه بودره، اختياري
(8)- جوز هند او زبيب او مكسرات للتزين على حسب رغبتك
●《 طريقه التحضير 》
في البدايه بنغسل الرز كويس جدا بالماء اكتر من مره، وبعدها نحطه في حله نضيفه عليه كوب ونصف تقريبا من الماء .بنسيبه على نار متوسطه لحد ما الرز يبدأ يستوي ويشرب معظم كميه الماء مش لازم الرز يستوي بالكامل من البدايه، لأنه هيكمل تسويه مع اللبن
بعد كده بنضيف اللبن بتدريج على الرز ، ونقلب كويس، ونسيبه على النار هاديه. وهنا اهم حاجه اننا ما نستعجلش عليه، لان الرز بلبن بيطلع احلى لما ياخد وقته على نار هاديه. كل شويه نقلبه من تحت لفوق عشان الرز ما يمسكش في قاع الحله.
لما نلاحظ ان الرز بدأ يتشرب اللبن وقوامه بقى كريمي، نضيف السكر ونقلب لحد ما يدوب تماما. بعد كده الفانيليا، ولو بتحبي الطعم الكريمي الغني ممكن تضيفي معلقه قشطه وتقلبيها مع الرز.
في طبق صغير، ندوب معلقه النشا في نصف كوب ماء بارد. لازم النشا يدوب كويس جدا قبل ما نضيفه،عشان ميعملش تكتلات . بعد كده ننزل بالخليط النشا على الرز بلبن مع التقليب المستمر. هنلاحظ إن القوام بدأ يتقل بسرعه، وده المطلوب
نستمر في التقليب على نار هاديه لمده دقيقه بسيطه،ولما نوصل للقوام اللى بنحبه نطفي النار . وخلي بالك ان الرز بلبن بيزيد تماسكه بعد ما يبرد، فالأفضل متخلهوش تقيل جدا وهو على النار.
نجيب الأطباق او الكاسات اللى هنقدم فيها الرز بلبن ، ونوزعه وهو دافي . ممكن نقدمه ساده او نزين الوش بجوز هند وزبيب ومكسرات مجروشه. لو بتحبي شكل مختلف، ممكن تضيفي رشه قرفه خفيفه او كميه بسيطه من الفستق المجروش على الوجه ولو عايزه الرز بلبن يكون زي بتاع المحلات ممكن بعد ما تحطي في الأطباق تسيبيه يبرد شويه بعدها تدخليه التلاجه لعده ساعات وقت التقديم هيكون بارد وكريمي وطعمه جميل جدا.
وفي النهايه سر نجاح الرز بلبن هو ان اللبن يكون كاما الدسم والنار تكون هاديه وتقليب يكون مسمتر مم وقت للتاني. وممكن تتحكمي في كميه السكر والنشا حسب القوام والطعم التحبيه وبكده يكون عندك طبق رز بلبن بيتي بسيط واقتصادي وطعمه حلو جدا ينفع للتحليه بعد الغدا او كحاجه خفيفه بليل 
(( جربوها وقولي رأيكم)]
